Tmerr në Istog të Kosovës, vritet një punonjës policie dhe një grabitës

Tmerr në qendër të Istogut në Kosovë. Dy persona kanë mbetur të vdekur  pas një shkëmbimi zjarri mes policisë dhe disa grabitësve të cilët kanë tentuar të vjedhin një bankë. Mediat raportojnë se njëri nga viktimat është një punojës policie dhe tjetri grabitësi. Polici që mbeti viktimë është I.D nga Istogu, ndërsa grabitësi që mbeti i vrarë është K.M. Grabitësi ishte kthyer nga Gjermania para pak vitesh, ku kishte vuajtur një dënim prej 17 vitesh për trafik lëndësh narkotike. Zëdhënësi i Policisë në Pejë, Xhevat Ibraj sqaroi se: “Konfirmoj se ka ndodhur një vrasje në Istog, ku pas një përleshje me armë zjarri, dy persona kanë vdekur, njëri nga ta është një pjesëtar i Policisë së Kosovës”. Policia e Kosovës dyshon se në tentativën për të grabitur bankën ka pasur edhe persona të tjerë të implikuar dhe po punon për arrestimin e tyre. Në rrugëkalimet kryesore Policia e Kosovës ka ngritur postblloqe për të mundësuar kapjen e bashkëpunëtorëve në këtë krim të rëndë. / P. Hasa /