Policia e shtetit bën të ditur se është vënë në pranga një tjetër person nga operacioni “Premtimi”, duke arrestuar një 26-vjeçar. Mësohet se bashkë me një tjetër person të arrestuar një javë më parë shfrytëzuan për prostitucion dy shtetase rumune duke u premtuar martesë.
Lexo edhe- Shfrytëzuan rumunet për prostitucion në Shqipëri, një i arrestuar dhe një në kërkim
NJOFTIMI
Vijon operacioni “Premtimi”, shkon në 2 numri i të arrestuarve.
Kapet dhe vihet në pranga dhe 1 shtetas i shpallur në kërkim në kuadër të këtij operacioni.
Në vijim të operacionit policor të koduar “Premtimi”, për goditjen e veprimtarisë kriminale në fushën e prostitucionit, finalizuar një javë më parë nga DVP Tiranë, si rezultat i të cilit u vu në pranga 1 shtetas, ka vijuar puna për identifikimin dhe kapjen e personave të tjerë të implikuar në këtë veprimtari kriminale.
Si rezultat është bërë e mundur kapja dhe ndalimi i shtetasit të shpallur në kërkim T. M., 26 vjeç, i dënuar më parë për veprat penale “Armëmbajtje pa leje” dhe ”Plagosja e lehtë me dashje”.
Ky shtetas, në bashkëpunim me shtetasin J. D. (i arrestuar një javë më parë), me premtimin për martesë dhe për t’u larguar në vendet e BE-së, kanë sjellë në Shqipëri dy shtetase, të cilat dyshohet se i kanë shfrytëzuar seksualisht me persona të tjerë.
Materialet i kaluan Prokurorisë së Rrethit Gjyqësor Tiranë, për veprime të mëtejshme.