Pas përfundimit të mbledhjes së shtabit elektoral të Partisë Socialiste, kryeministri Edi Rama tha se partia e tij koalicionin e ka me njerëzit.
“Sistemi që kemi zgjedhur është një sistem ku cdo parti garon me simbolin e saj dhe me skuadrën e saj, ose bën një koalicion me një simbol dhe në një skuadër të përbashkët. Ne e kemi pasur të qartë, që ne koalicionin e kemi me njerëzit dhe shumicën e kemi me njerëzit. Kështu që nuk kemi asnjë diskutim në këtë pikë. Sigurisht e mirëkuptoj pyetjen, duke parë se cfarë ndodh në kampin tjetër, ku po punohet për një hibrid të pangrënshëm, të pagëlltitshëm dhe të patretshëm”, tha Rama.
Përsa i përket propozimit të PD-së për shtyrje të afatit të rinovimit të kartave të identitetit deri më 30 prill, Rama tha se mirëpret çdo propozim dhe do shihet me seriozitet.
“Kur bëhet fjala për zgjedhjet, janë të përbashkëta, rregullat e lojës janë të aprovuara bashkarisht dhe cdo propozim i arsyeshëm që secila palë bën e që është në interse të procesit zgjedhor është absolutisht i mirëseardhur. Sigurisht që bën sens dhe do trajtohet me seriozitetin e duhur që të gjitha palët në proces të ndjehen të barabarta përsa i përket marrëdhënies me publikun dhe rregullat e lojës”, tha Rama më tej.