Kryeministri Edi Rama ka prezantuar zyrtarisht Luljeta Bozon si kandidate për deputete në listën e Partisë Socialiste.
Duke folur në programin “Rindërtimi nuk ndalet” Rama tha se Bozo do të përfaqësojë një shtresë të gjerë shoqërore dhe që do të jetë “një ndihmë e madhe për të na shkulur dhe veshin me kujdes që të mos na e këpusësh por që ne të mund të jemi gjithmonë të fokusuar”.
“Dua të të falënderoj shumë dhe tani dua ta ndaj dhe me ata që janë këtu dhe po na ndjekin që ti u tregove zemër gjerë dhe pasi u mendove nuk the jo për të qenë pjesë e skuadrës sonë të 25 prillit ku me kënaqësinë dhe nderin më të madh timin dhe forcës tonë politike ne do të kemi një përfaqësues të një shtrese të gjerë shoqërore që janë gjyshërit dhe gjyshet dhe sigurisht një përfaqësues kaq të denjë e vital që ka akoma shumë për të dhënë dhe që nga maja e eksperiencës së vet dhe integritetit të vet si inxhiniere, si nënë, si gjyshe dhe si stërgjyshe do të jesh një ndihmë e madhe për të na shkulur dhe veshin me kujdes që të mos na e këpusësh por që ne të mund të jemi gjithmonë të fokusuar. Luljeta është simbol i gjithë përpjekjes solidare të shqiptarëve që u bënë bashkë si asnjëherë me parë në ato momente të tmerrshme dhe është dhe mishërimi i ambicies sime dhe i dëshirës së madhe që skuadra jonë, përfaqësuesit tanë në Parlament të jenë shëmbëlltyra e tyre”, tha Rama.