Gjykata e Tiranës ka dënuar me 5 vite burg Orges Bilbilin, i cili u shpall fajtor ndaj akuzave për armëmbajtje pa leje dhe kanosje për shkak të detyrës të punonjësit të policisë që prangosi më 10 prill 2020.
Ky është vendimi i parë që Gjykata ka marrë ndaj Bilbilit, i cili akuzohet si një nga autorët e masakrës së Lushnjes. Në Gjykatën kundër Korrupsionit dhe Krimit të Organizuar, Bilbili; Anterio Kaloshi dhe Laert Haxhiu që ende është në kërkim po gjykohen për disa vrasje të ndodhura në qytetin e Lushnjës.
Orgest Bilbili dhe Laert Haxhiun janë akuzuar për vrasjen e Jurgen Hoxhës dhe Zamir Latifit si dhe tentativën e vrasjes së Xhulio Shkurtit, nipit të Aldo Bare. Veç akuzës së vrasjes në rrethana cilësuese të një ose më shumë personave, Bilbili akuzohet për “Kryerjen e veprave penale në kuadër të grupit kriminal”.
Ai ishte shpallur në kërkim prej kohësh, por u arrestua rastësisht vjet në prill teksa kishte dalë nga shtëpia ndërsa vendi ishte në karantinë prej pandemisë së koronavirusit.