Policia e Elbasanit ka vënë në pranga një 46-vjeçar i cili ishte shpallur në kërkim ndërkombëtar nga Italia.
Eduart Haxhi është dënuar nga gjykata e Apelit të Torinos me dhjetë vjet dhe 4 muaj burg për akuzën e shfrytëzimit të prostitucionit dhe shtyrje për prostitucion në rrethana rënduese.
NJOFTIMI
Vijon puna për kapjen e personave të shpallur në kërkim ndërkombëtar.
Arrestohet me qëllim ekstradimi drejt Italisë, një shtetas shqiptar i dënuar nga autoritetet italiane.
Specialistët për Hetimin e Narkotikëve dhe Trafiqeve të Paligjshme, në bashkëpunim me Forcën e Posaçme “Operacionale” në Drejtorinë Vendore e Policisë Elbasan dhe Interpol Tirana, pas një pune të mirorganizuar, lokalizuan, kapën dhe arrestuan përkohësisht, me qëllim ekstradimi drejt Italisë, shtetasin shqiptar të shpallur në kërkim ndërkombëtar:
Eduart (Artan) Haxhi, 46 vjeç, banues në Elbasan.
Kapja dhe ndalimi i tij u bë pasi Gjykata e Apelit Torino, Itali, në datën 04.03.2008, e ka dënuar me 10 vjet e 4 muaj burgim, për veprat penale “Shfrytëzim prostitucioni” dhe “Shtyrje për prostitucion në rrethana rënduese”, parashikuar nga Kodi Penal italian.
Veprimet e mëtejshme për këtë shtetas do të kryhen nga zyra e Interpolit Tiranë.