Gjatë vizitës së tij në Vlorë kryedemokrati Lulzim Basha është takuar edhe me aktorë vlonjatë mes të cilëve Bujar Asqeriu dhe parodistët e Vlorës.
Njëri prej paroditësve Mania, i cili vuan nga një sëmundje që i ka marrë zëri tha se pensioni i tij është një pension i thjeshtë pa përfituar pensionin e artistit.
Ndërsa mjaft i revoltuar është shfaqur aktori Bujar Asqeriu. Ai i tha Bashës se ka dy plagë në zemër, naftëtarët dhe minatorët.
“Të më falësh zoti Basha, kam dhe dy plagë në zemrën time, që po jua referoj – tha Bujar Asqeriu. – Plagën e parë e kam për naftëtarët, të cilët i kanë dhënë miliona euro këtij vendi. Dhe sot treten dobësohen dhe nuk jetojnë as me shtëpi të mira, as me shëndet të mirë.
Dhe cinizmi i tmerrshëm i Kryeministrit që u thoshte “dilni nga greva dhe pastaj më takoni mua!!!!”, është cinizëm dhe urrejtje njerëzore. Kjo është urrejtje njerëzore të mos duash njeriun! Luftë nuk mund të bësh, nuk mund të jesh drejtues i një vendi nëse nuk do njeriun, nuk do shqiptarin. Pa dashuri nuk fiton asnjë betejë! Vetëm me dashuri fitohet beteja, vetëm me respekt fitohet beteja.
Për naftëtarët – një: që familjeve të naftëtarëve që janë pa shtëpi t’u bëhen shtëpi të reja dhe infrastruktura të rregullohet e paga të jetë dinjitoze dhe për minatorët e Bulqizës – dy, që po vdesin për galeri. Shkoni në Bulqizë dhe shikoni si është gjendja e tyre e mjeruar. Si qytetarë po t’i them këto dy plagë!”