Gentian Muça këtë vit ka vendosur që karrierën e tij futbollistike, ta kombinojë me një tjetër shumë të veçantë, atë të politikanit. Në zgjedhjet e këtij viti, ish-kapiteni i Tiranës kandidon në kryeqytetin shqiptar, duke shpresuar që me famën e tij të sigurojë votat e nevojshme për të qenë përfaqësues në parlamentin e ardhshëm.
Por një dokument, më saktësisht një dënim nga shteti gjerman, mund të bëhet pengesë për të, ashtu siç u bë një dekadë më parë për të veshur fanellën e përfaqësueses. Në vitin 2010, Gentian Muça shihej nga të gjithë si një lojtar shumë premtues dhe ishte një kandidat për të veshur fanellën e përfaqësueses shqiptare.
Trajneri Josip Kuzhe vendosi që të grumbullonte lojtarin me kuqezinjtë, por asokohe u mësua se Muça nuk mund të udhëtonte dot në vendet e zonës Shengen, pasi kishte shkelur lejen e qëndrimit të tij në Gjermani. Ai kishte qenë atje me vizë studentore, edhe pse kishte përfunduar duke luajtur në disa ekipe futbolli. Kësisoj, Muçës iu dha një përjashtim nga Shengeni, duke shkatërruar shanset e tij që të vishte fanellën kuqezi, pavarësisht tentativave për të ndryshuar këtë masë.
I njëjti dënim, është bërë tashmë temë hetimi nga KQZ, që ka kërkuar verifikimin e figurës së Muçës mbi arsyet e këtij përjashtimi nga shteti gjerman të futbollistit i cili aktualisht është pjesë e Prishtinës në kampionatin kosovar. Vetëm pasi të sqarohen rrethanat, e të verifikohet versioni i Muçës, atëherë ai mund të kandidojë në zgjedhje.