Pandemia vijon të mbushë spitalet dhe jo vetëm me të sëmurë me Covid-19. Në Francë dhe në Belgjikë, shifrat e të miturve të shtruar në repartet psikiatrike janë alarmante.
Shumica janë pacientë nën moshën 15 vjeç.
Të rinjtë vuajnë nga ankthi dhe paniku, por dhe nga depresioni, çrregullime në ushqim. Psikiatrit rendisin anoreksinë ndër shqetësimet kryesore. Në reparte ka të mitur që kanë humbur deri në 20 kilogramë dhe në pjesën më të madhe të rasteve prindërit as nuk e kanë vënë re një gjë të tillë.
Mes të sëmurëve rëndë ka dhe fëmijë e adoleshentë me depresion, paranojak dhe me mani persekutimi. Sigurisht ka edhe adoleshentë të cilët vuajnë nga mungesa e vëmendjes, dhe është kjo grupmoshë që alternon një javë mësimin në klasë dhe një javë online.
Pjesa më e madhe e tyre nuk duan të kthehen më në klasë. Një numër i madh i tyre ka humbur zakonin për t’u zgjuar herët dhe kur rikthehen në klasë nuk pranojnë të qëndrojnë ulur për 7 orë.
Repartet psikiatrike po përgatiten të rrisin stafin e tyre edhe pas pandemisë. Në fakt, të rinjtë po vuajnë jo vetëm pasojat psikologjike por edhe ekonomike të kësaj krize.
Sipas mjekëve, ndjenja e pasigurisë që ata kanë do të vazhdojë të shkaktojë sëmundje të reja te më të rinjtë.