Pas 6 orë marrjesh në pyetje në lidhje me operacionin ‘Braktisja’, mëngjesin e sotëm është lënë i lirë ish-kreu i Aviacionit Civil, Petrit Sulaj. Bëhet fjalë për protestën e kontrollorëve të AlbControl në Rinas, të cilët në shenjë kundërshtie për uljen e pagesave, pezulluan punën.
Ndërkohë është zbardhur edhe dëshmia e tij në Policinë e Tiranës.
Sulaj u thirr për të dëshmuar nëse ka lidhje me vendimmarrjen e kontrollorëve për të braktisur vendin e punës, duke pezulluar kështu fluturimet në Rinas, pasi ishin zbuluar biseda që ai kishte kryer me ta. Nga ana tjetër, Sulaj ka mohuar të ketë pasur gisht në vendimmarrjen e tyre.
“Nuk kam pasur asnjë rol në këtë vendimmarrje. Kam njohje personale me disa prej kontrollorëve dhe ndaj vijoj dhe komunikimin me ta”, mësohet të jetë shprehur ai, ndërsa nënvizoi faktin se si ish-drejtori është kundër braktisjes së punës në një sektor kaq jetik që është hapësira ajrore.