Komisioni i Pavarur i Kualifikimit shkarkoi nga detyra prokurorin e Beratit, Tasim Puci. Vendimi u dha të enjten nga trupa gjykuese e përbërë nga Olsi Komici, Suela Zhegu dhe Genta Tafa Bungo.
Por pas vendimit, ndodhi diçka e papritur.
Prokurori ndoqi nga pas anëtarët e trupës duke u shprehur:
“Ku do më çoni tani? Jam pa shtëpi e katandi”.
Kanë ndërhyrë forcat e sigurisë, të cilat ndaluan prokurorin e shkarkuar për të kaluar nga salla në zyrat e komisionerëve.
KPK tha se e gjeti me probleme në të tre kriteret e rivlerësimit për prokurorin Puci.
Gjatë seancës dëgjimore, ai u pyet në lidhje me një kontratë noteriale në të cilën ai rezultonte pronar i një apartamenti, të cilin ia kalonte vjehrrit dhe disa shkëmbime financiare me këtë të fundit.
Puçi pretendoi se nuk kishte asnjë pasuri në emër të tij dhe kërkoi konfirmimin në detyrë.