Menjëherë pas përfundimit të protestës së sotme të opozitës kryeministri Edi Rama ka folur për median italiane, “Il Messaggero” ku e quan këtë protestë jo të popullit, por të atyre që pesë vite më parë i përzuri populli nga pushteti.
“Por çfarë proteste e popullit! Këtu nuk jemi përballë jelekverdhëve, studentëve, sindikatave apo forcave të tjera të shoqërisë. Kjo është protesta e organizuar nga establishmenti i para 5 viteve që është përzënë me forcë nga populli me një milion vota. Më vjen keq që mediat italiane i kanë dhënë aq shumë rëndësi një manifestimi të opozitës në të cilën është nxitur dhuna”, është shprehur Rama.
Ai iu përgjigj dhe krahasimit që opozita i bëri me Maduron në Venezuelë, për të cilën tha se tashmë do të kishte probleme me SHBA dhe BE-në. Ai akuzoi opozitën se jep një imazh të rremë të vendit dhe të ardhmes së Shqipërisë.
“Italianët duhet të dinë se jemi thjesht në prag të zgjedhjeve vendore. Opozita është pas në sondazhe dhe e di se do të humbasë në thuajse të gjitha qytetet”, ka thënë mes të tjerash Rama.