Ministri i Financave, Petrit Malaj, prezantoi në Konferencën e Kryetarëve projektbuxhetin për vitin 2027, i cili parashikon mbi 10 miliardë euro shpenzime publike dhe vendos në fokus mbrojtjen sociale, investimet dhe konsolidimin e financave publike.
Sipas Malajt, projektbuxheti synon të garantojë rritje të qëndrueshme ekonomike, të përmirësojë mirëqenien e qytetarëve dhe të mbështesë procesin e integrimit evropian të Shqipërisë.
Një nga pikat kryesore të projektbuxhetit është mbështetja për pensionistët. Nga 1 janari 2027 parashikohet dyfishimi i bonusit mujor për pensionistët, sipas kategorive përkatëse, me një kosto totale prej 20 miliardë lekësh për vitin. Ndërkohë, në prill 2027 parashikohet indeksimi i pensioneve, me një fond prej rreth 1.35 miliardë lekësh.
Në fushën e mbrojtjes sociale, projektbuxheti parashikon dyfishimin e pagesave për fëmijët me aftësi të kufizuara, mbështetje mujore për fëmijët deri në moshën pesë vjeç dhe rreth 1.3 miliardë lekë për shërbimet sociale dhe strehimin e përballueshëm.
Për vitin 2027, të ardhurat buxhetore parashikohen në 907.9 miliardë lekë, ose 30.9% e Prodhimit të Brendshëm Bruto. Deficiti buxhetor synohet në 2.3% të PBB-së, ndërsa borxhi publik parashikohet të zbresë në 52.4% të PBB-së.
Investimet publike do të arrijnë në 201.5 miliardë lekë, ose 6.9% të PBB-së, duke financuar projekte në infrastrukturë, transport, energji dhe shërbime publike.
Arsimi dhe shëndetësia mbeten gjithashtu sektorë prioritarë. Për arsimin parashikohen 93.6 miliardë lekë, ndërsa për shëndetësinë 87.2 miliardë lekë. Fondet do të mbështesin bursat për studentët në nevojë, programin “Pas Shkollës”, financimin e barnave dhe pajisjeve mjekësore, si dhe rehabilitimin dhe ndërtimin e spitaleve.
Buxheti parashikon gjithashtu 17.9 miliardë lekë për bujqësinë, 76.7 miliardë lekë për Ministrinë e Mbrojtjes dhe 114.6 miliardë lekë për buxhetin vendor.
Krahas projektbuxhetit, Ministria e Financave ka hartuar edhe Paketën Fiskale 2027. Ndryshimet e propozuara përfshijnë rritjen e tatimit mbi dividendin nga 8% në 15%, rritjen e normës standarde të TVSH-së nga 20% në 21%, uljen e pragut të regjistrimit në TVSH nga 10 milionë në 5 milionë lekë dhe aplikimin e normës së reduktuar prej 6% për 54 produkte të shportës bazë.
Sipas Malajt, projektbuxheti dhe paketa fiskale synojnë të ruajnë stabilitetin financiar të vendit, të forcojnë mbështetjen për qytetarët dhe të financojnë prioritetet e zhvillimit ekonomik në periudhën 2027–2029.
Projektbuxheti pritet të diskutohet më tej në komisionet parlamentare.