Baton Haxhiu i akuzuar nga Sali Berisha si agjent i Serbisë, ka bërë një deklaratë të papritur mbrëmjen e sotme. Në studion Open të Eni Vasilit, ai tha se LSI dhe PD rrezikojnë të zhduken dhe vendin e tyre ta zërë lëvizja Vetëvendosje.
Haxhiu ka guxuar ndërsa ka paralajmëruar zhdukjen e forcës më të madhe opozitare, pra PD-së dhe zbehjen e LSI-së, partia e dytë më e madhe e opozitës.
“Do kemi hapësirë për një parti politike e cila mund të ndërtohet pas një muaj ose dy muaj. Mund të jetë Vetëvendosja. Dorëheqja i lë hapësirë Vetëvendosjes për të qene pjesë e jetës politike në Shqipëri. Dhe nuk janë të paktë njerëzit që janë të gatshëm për të formuar një parti politike shumë shpejt. Partitë si LSI dhe PD, njëra do zbehet, tjetra do zhduket, sepse shqiptarët do kërkojnë diçka të re”, është shprehur Baton Haxhiu.
Pak javë më parë, nga Kosova u importua debati i ditës në Tiranë. Politikanë të të gjitha niveleve, opinionistë dhe gazetarë “pushtuan” ekranet e Shqipërisë duke diskutuar disa nga temat më të nxehta të aktualitetit, siç është debati për kufinjtë. Edhe Albin Kurti ishte në Tiranë dhe u bë pjesë e zhvillimeve këtu duke bërë dhe komente për protestën e studentëve, një deklaratë e të cilit nuk u prit mirë në Tiranë. Nuk dihet ende nëse Batoni e ka hedhur këtë deklaratë për konsum publik apo ka ndonjë informacion më tepër mbi ato çka lëviz jashtë syve të publikut.