Kryeministri Edi Rama ka bërë me dije se këtë javë pritet që në Shqipëri të vijnë mbi 11 mijë doza vaksinazh nga Pfizer. Në një postim në faqen e tij në Facebook, Rama shkruan se tashmë objektivi është që në vendin tonë të vaksinohen 1 milionë persona.
“Sheshi Skënderbej. Vijojmë papushim tanimë drejt objektivit 1 milion vaksina të kryera. Këtë javë do të mbërrijnë mbi 11 mijë vaksina Pfizer, teksa numri total i vaksinave të ardhura në Shqipëri është mbi 736 mijë,”- shkruan Rama krah postimit.
Deri më tani në vendin tonë janë vaksinuar mbi 500 mijë qytetarë. Aktualisht ka nisur shpërndarja e dozave tek moshat mbi 60 vjeç. Në vendin tonë janë imunizuar bluzat e bardha, janë vaksinuar gazetarë, efektivë policie, mësues e pedagogë. Aktualisht në vendin tonë janë duke u përdorur vaksina Pfizer, AstraZenca, vaksina ruse Sputnik V dhe ajo kineze Sinovac.