Armando Marku, futbollisti i cili dhunoi sot gjyqtarin e ndeshjes mes Sopotit dhe Mirditës në Katogorinë e Dytë, është vetëdorëzuar sot në polici, pak orë pas ngjarjes së rëndë. Pasi gjakosi gjyqtarin gjatë ndeshjes, Marku i cili ishte futur të luante me identitet të rremë në këtë sfidë, u arratis nga stadiumi.
Ai është larguar nga ambientet e impiantit të Cërrikut në drejtim të paditur dhe ishte shpallur në kërkim. Por gjatë orëve të darkës, ai është paraqitur në Komisariat duke u dorëzuar vetë para uniformave blu dhe duke dhënë dëshminë e tij për ngjarjet në fjalë.
Për Markun padyshim mund të cilësohet e mbyllur karriera futbollistike, pasi në raste të tilla FSHF ka qenë drastike me vendimet, duke përjashtuar sidomos lojtarët në kategoritë e ulëta, pasi mbyll një sy vetëm për zyrtarë të klubeve në elitë. Por tashmë me ligjin e ri ai duhet të përgjigjet edhe penalisht për dhunën e ushtruar ndaj gjyqtarit dhe rrezikon nga gjoba deri në burgim.