Qyteti i Elbasanit u trondit sot nga një krim brenda familjes. 58-vjeçari me inicialet K.B qëlloi për vdekje me kallashnikov bashkëshorten e tij 54-vjeç në derë të Gjykatës së Elbasanit, ndërsa la të plagosur edhe 2 persona të tjerë, të cilët mësohet se janë jashtë rrezikut për jetën.
Mësohet se çifti sapo kishte zhvilluar një seancë gjyqësore për procesin e divorcit mes tyre. Fillimisht nga dera e gjykatës ka dalë autori i krimit i cili ka pritur edhe daljen e bashkëshortes, për të hapur më pas zjarr ndaj saj dhe duke e lënë kështu të vdekur.
Çifti ishin prindër të tre fëmijëve, konkretisht një vajze 26-vjeçe, dhe dy djemve 20 dhe 18 vjeçar.
Ndërhyrja në kohë e shërbimeve të Policisë ka bërë të mundur kapjen dhe prangosjen e autorit, sekuestrimin e armës së zjarrit tip kallashnikov dhe të një arme të ftohtë thikë.
Në vendngjarje ndodhet grupi hetimor dhe nën drejtimin e Prokurorisë vijon puna për zbardhjen e rrethanave të ngjarjes.