Përkujtohen xhenierët, dëshmorë të Atdheut major Tanushi dhe nëntetare Hasanaj, rënë në krye të detyrës në Letoni
Sot, në batalionin e xhenios të komandës mbështetëse u zhvillua ceremonia përkujtimore e rënies në detyrë të dëshmorëve të Atdheut, major Klodian Tanushi dhe nëntetare Zarife Hasanaj. Në këtë ceremoni ishin të pranishëm dhe familjarët e dëshmorëve, njoftoi komanda mbështetëse.
Komandanti i batalionit të xhenios (bXh), kolonel Hajdar Gurra, theksoi sakrificën sublime në krye të detyrës, si shembull i sakrificës, dinjitetit dhe përkushtimit, duke mos kursyer as veten, për një botë të pastër pa mina.
Zëvendësshefja e Shtabit të Përgjithshëm të Forcave të Armatosura gjenerale brigade Manushaqe Shehu shprehu mirënjohjen për aktin sublim të dëshmorëve rënë në Letoni dy vite më parë.
“Emri i tyre nderohet në Aleancë, rënia e tyre përkujtohet sot nga kolegët e NATO” – u shpreh ajo.
Ky është përvjetori i dytë i rënies në detyrë të dëshmorëve më të rinj të atdheut, major Klodian Tanushi dhe nëntetare Zarife Hasanaj, që janë përkujtuar në një ceremoni po më 6 maj 2021 edhe në Letoni.