Banorët e fshatit Macukull në Bashkinë e Matit u kanë ardhur në ndihmë turistëve që po ngjiteshin në malin e Dejës.
Mësohet se njëri prej tyre, duke u ngjitur në majën e këtij mali të lartë, ka rrëshqitur dhe ka përfunduar në humnerë, e cila ishte mbushur më dëborë.
“Sapo jemi njoftuar për ngjarjen kemi organizuar banorë të zonës dhe kemi mbërritur në vendin e ngjarjes. Turisti nga Tirana kishte rrëshqitur në një hon të mbushur me borë. Arritëm ta nxjerrim dhe mundësuam transportin e tij me kafshë ngakese. Fatmirësisht nuk ka probleme për jetën, por kishte pësuar dëmtime në trup dhe ishte në panik të madh”, tha një zyrtar i Bashkisë Mat.
Ngjarja bëri që afro 40 turistët e ardhur nga kryeqyteti në fshatin malor të Macukullit ta ndërprisnin udhëtimin pa mbërritur në majën e Dejës dhe të zbrisnin në qendër të fshatit.