Gugash Magani e sheh ndeshjen mes Teutës dhe Partizanit si një finale të mirëfilltë që do i vendosë kapakun Superiores sa i përket luftës së titullit kampion. Trajneri i cili me Egnatian e tij do të përballet në edicionin e ardhshëm në Superiore me këto dy skuadra, e sheh të merituar kryesimin e durrsakëve, por në fjalët e tij në “Fair Play” ka shpjeguar se sheh njëkohësisht edhe të kuqtë si ekipin më në formë aktualisht.
“Teuta është me meritë në këto pozita, ka qenë e dalluar këtë vit. Ka pësuar më pak e ka luajtur shumë mirë në fazën mbrojtëse dhe ka shënuar mjaftueshëm gola. Mendoj se Teuta ka shansin për të marrë titullin kampion duke pasur parasysh që është një 90 minutësh nesër me Partizanin që është i rëndësishëm sa i përket menaxhimit e trysnisë që ka kjo ndeshje. Mendoj se Teuta e Partizani kanë brenda shumë eksperiencë dhe duke e pasur janë më të avantazhuar.
Por pavarësisht oscilacioneve Partizani është skuadra më në formë e këtij vit, bashkë me Teutën. Do të jetë një ndeshje shumë e fortë”, tha ai.