Këshilli i Lartë i Prokurorisë caktoi dje në detyrën e këshilltarit pranë këtij institucioni 6 prokurorë. Për këtë vend mësohet se kanë shprehur interesin e tyre 10 prokurorë, ndërsa gjatë seancës së djeshme u miratua kandidimi i 6 prej tyre.
“Miratohet unanimisht komandimi i 6 këshilltarëve pranë KLP-së: Arjan Muçaj, Artur Cara, Mihallaq Bleta, Mirela Kapo, Ornela Rrumbullaku dhe Vitjuna Mata”, njoftoi KLP-ja. Gjatë fjalës së tij në seancën plenare, drejtuesi i Këshillit të Lartë të Prokurorisë, Gent Ibrahimi, u shpreh se emërimi i prokurorëve në këtë detyrë nuk duhet të cenojë punën në prokuroritë ku ushtrojnë detyrën.
“Këta prokurorë të komanduar pranë KLP-së nuk duhet të cenojnë mbarëvajtjen e veprimtarisë së prokurorive nga ku po vijnë”, tha ai. Konkretisht, prokurori Arjan Muçaj është prokuror pranë Prokurorisë së Gjirokastrës, Artur Cara në Prokurorinë e Fierit, ndërsa më herët ka qenë oficer i task-forcës në Prokurorinë e Tiranës. Mihallaq Bleta ushtron detyrën në Prokurorinë e Lezhës.
Prokurorja Mirela Kapo, e cila hetoi dhe arrestoi djalin e deputetit Rrahman Rraja, punon në Prokurorinë e Krujës. Prokurorja Ornela Rrumbullaku ushtron detyrën në Prokurorinë e Durrësit, ndërsa prokurorja Vitjuna Mata në Prokurorinë e Vlorës.
Panorama