Ministria ruse e Mbrojtjes publikoi të premten pamje të avionëve me kapacitete bërthamore “Tu-22M3” teksa fluturonin mbi detin Mesdhe në kuadër të një stërvitjeje.
Avionët bombardues shoqëroheshin nga avionë të tjerë luftarakë, bëri të ditur ministria në një deklaratë.
Sipas njoftimit, fluturimi ishte pjesë e një stërvitjeje të përbashkët detare dhe ajrore në lindje të Mesdheut, ku Moska vepron në një bazë ajrore në bregun sirian.
Baza Hmeymin u ndërtua në vitin 2015, kur Rusia ndërhyri ushtarakisht në konfliktin sirian.
Po të premten, Moska zyrtare paralajmëroi Britaninë dhe Shtetet e Bashkuara që të mos luajnë me zjarrin duke dërguar anije luftarake në Detin e Zi dhe deklaroi se do të mbrojë kufijtë e saj me çdo mjet, edhe duke përdorur forcën ushtarake.
Në një deklaratë, zëdhënësi i Ministrisë së Mbrojtjes u shpreh se nuk do të ishte e mençur që Londra dhe Uashingtoni të afroheshin në brigjet e Krimesë, të cilën Moska e aneksoi nga Ukraina në vitin 2014.
“Pas dështimit epik për të shkaktuar provokime, ne i bëjmë thirrje Pentagonit dhe marinës britanike, që po dërgojnë anijet e tyre në Detin e Zi, të mos luajnë me fatin.
Anija britanike “Defender”, e cila lundroi të mërkurën në ujërat e Krimesë, nuk ishte gjë tjetër veç se një objektiv për ne”, tha gjeneral Igor Konashenkov, zëdhënës i Ministrisë së Mbrojtjes.
Rusia deklaroi të mërkurën se kishte qëlluar të shtëna paralajmërimi dhe se kishte vendosur bomba në shtegun e anijes britanike, me qëllim për ta dëbuar nga brigjet e Krimesë.