Matt Hancock ka dhënë dorëheqjen si Ministër i Shëndetësisë pasi deputetët, ministrat dhe konservatorët kritikuan ashpër Boris Johnson dhe kërkuan që Matt të shkarkohej nga qeveria.
Në letrën e tij të dorëheqjes Hancock shkruante se “Ne kemi punuar aq shumë si një vend për të luftuar pandeminë. Gjëja e fundit që do të dëshiroja është që jeta ime private të heq vëmendjen nga puna që po na nxjerr nga kjo krizë. Unë dua të ritheksoj faljen time për prishjen e rregullave dhe t’i kërkoj falje familjes sime dhe të dashurve të mi. Unë gjithashtu duhet të jem pranë fëmijëve të mi në këtë kohë”.
Sipas mediave britanike, Matt Hancock dhe Gina Coladangelo, po planifikojnë të largohen nga bashkëshortët e tyre dhe të jetojnë së bashku.
Tashmë polemikat janë në lidhje me emërimin e Gina Coladangelo, e cila fillimisht thuhej se kishte pranuar rolin në Departament pa pagesë, por rezulton se ajo është paguar nga taksapaguesit.
43-vjeçarja tregoi në një intervistë të disa kohëve më parë se me Matt u takua dhe u njoh kur ishin në Universitetin e Oxfordit, ndërsa të dy punonin, ajo si spikere lajmesh në radio dhe ai reporter sportiv.