Të ngatërrosh moshën dhe emrin e personazheve të njohur është një prej gjërave që ndodh më shpesh, madje jo vetëm në Shqipëri, por kudo në botë. Nuk janë të rralla edhe rastet kur vetë personazhet janë prezantuar me emra të tjerë në publik, ndërkohë që të tjerë kanë në pasaportë.Ju, me siguri, e mbani mend rastin e Aurela Gaçes, që në pasaportë mbiemrin e ka Gaçaj. Askush nuk e kishte ditur më parë derisa vetë këngëtarja e zbuloi kur ishte e ftuar në “Xing me Ermalin”.
Edhe Jonida Maliqi, ashtu siç e kemi njohur të gjithë, nuk paska këtë mbiemër në pasaportë. Sot, ajo ka postuar një foto nga pasaporta, në të cilën lexohet qartë mbiemri Maliqaj. Meqenëse të gjithë e njohim Jonida Maliqi, fotoja qarkulloi shpejt dhe lajmi mori dhenë.
Por nuk qenka vetëm mbiemri. Shumë është aluduar edhe me ditëlindjen e këngëtares, aq sa, sa herë ajo feston ditëlindjen në mars, numri i viteve është i ndryshëm nëpër lajme.
Në të vërtetë, këtë vit, Jonida postoi vetë një foto me numrin 35 në Instagramin e saj, edhe pse, në të vërtetë, gabimi në këtë rast është i Wikipedia-s, sepse aty viti i lindjes së këngëtares është 1982.
Gjithsesi, ju e dini që edhe Wikipedia gabon në shumë raste. Ashtu siç ka gabuar për shumë vite edhe me ditëlindjen e Bleonës. Derisa vetë këngëtarja deklaroi se ditëlindja e shënuar në internet është e pasaktë.
Në fakt, vitet janë thjesht dhe vetëm në pasaportë si për Jonidën, ashtu edhe për Bleonën, sepse asnjëra prej tyre nuk e tregon moshën që ka. Vitet e tyre le t’i mbajë pasaporta, ndërsa kohën e kanë vetë në menaxhim. Ose jo, meqë koha e tyre nuk e njeh më orën.
