Marjus Dema, i riu që vrau shokun e tij Mehmet Qema mbrëmjen e datës 10 maj ka lënë qelinë.
Top Channel mëson se Gjykata e Apelit ndryshoi masën e sigurisë për Marius Demën, i cili u la në burg nga Shkalla e Parë, por pas ankimit, Gjykata e Apelit vendosi ta lërë atë më masën e sigurisë “Arrest shtëpie”.
Si ndodhi vrasja
Pak para se të humbte jetën, 27-vjeçari Mehmet Qema i bëri me shenjë shokut të tij, Marius Dema që të largojë armën.
Por 28-vjeçari vazhdoi të luante me vdekjen ndër duar, derisa arma u shkrep dhe i mori jetën. Përveç Marius Demës që u vetëdorëzua disa orë pas krimit, u vetëdorëzuan edhe shokët e tjerë që gjendeshin së bashku me ta përtej orës policore.
Autori, Marius Dema u soll në vendngjarje disa orë më pas për të treguar se ku ishte hedhur pistoleta e krimit, ndërkohë që u shfaq i traumatizuar.
“As unë nuk e di se si ndodhi”, deklaroi para prokurorisë 28-vjeçari.
Dëshmitarët, mes tyre Eder Pjetra tregojnë se përpara vrasjes të rinjtë po qëndronin qetësisht dhe nuk kishin asnjë konflikt. Kurse për pajisjen që prodhon monedhat bitcoin, që u gjet në zonën ku ndodhi vrasja, ka shtuar se ky ambient i ishte dhënë me qira Marius Demës, i cili përveç vrasjes pritet të merret në pyetje edhe për laboratorin të zbuluar rastësisht.
Më herët, gazetarja e ‘Top Channel’, Anila Hoxha siguroi pamjet ekskluzive pak momente para se të ndodhte vrasja e 27-vjeçarit, Mehmet Qema. Sikurse shihet në video autori 28-vjeçar, Marius Dema ka qenë duke e mbajtur armën në dorë, ndërsa personat e tjerë, të cilët janë shpallur në kërkim, kanë qenë të ulur në tavolinë bashkë me viktimën.
Mësohet se viktima Mehmet Qema njihej edhe me nofkën tallman ose hasjanali dhe vetëm disa ditë më parë kishte ardhur nga Londra. Një nga të shpallurit në kërkim për moskallëzim krimi është edhe i dashuri i këngëtares shqiptare Baby G, njëkohësisht edhe mik i ngushtë i Stresit, Blerim Hoti, ose i njohur ndryshe si Lim Hoti.