Studentët i kishin akuzuar për ngacmime seksuale dhe për shitje librash me detyrim, dhe nisur nga akuzat rektori i universitetit Bujqësor të Kamzës ka vendosur shkarkimin e tre pedagogëve.
Duke folur për gazetën “Shekulli”, rektori Bahri Musabelliu thotë se janë firmosur pesë urdhëra dhe priten dhe shkakrime të tjera.
““Më vjen keq ta them, por nuk kam pse e fsheh, deri më tani kam firmosur pesë urdhra dhe një do e bëjë nesër (sot). Kryesisht me bazën e indiceve që kam pasur nga studentët, të cilët kanë denoncuar për ngacmime seksuale, për shitje tekstesh me detyrim, mit-marrje dhe ngacmime seksuale vajzash. Këto raste nuk mund t’i lija pezull. Kam pasur raste kur studentët janë ankuar për pedagogë të paaftë dhe për shitjen e librave, të cilët nuk u kanë shërbyer atyre”, thotë rektori Musabelliu.
Mjaft i prekur nga rastet, sidomos ato të ngacmimi seksual, Musabelliu thotë se ka qarë teksa disa vajza studentë i kanë treguar në zyrë për sjelljen e një pedagogu, që ai nuk ia përmend emrin për arsye etike.
“Mua nuk më kishte ndodhur asnjëherë të më vinin në zyrë studentët dhe të më tregonin se çfarë bëjnë pedagogët. Dy vajza dhe një djalë, nga Mjekësia Veterinare kur me treguan për ngacmimet seksuale të një pedagogu dhe u pohua nga të tre. Nisa të qaja kur më erdhën në zyrë. Kam qarë dhe e vetmja gjë që kam menduar në ato momente, ka qenë vajza ime. Nuk jam ndjerë asnjëherë më keq, gjatë gjithë jetës sime. I inkurajoj ato vajza që guxuan të thonë të vërtetën. Madje unë në telefonin tim kam bisedat, që studentet kanë komunikuar me njëra-tjetrën në lidhje me këtë ngjarje”, tha Musabelliu.
