Thatësira e tejzgjatur dhe i nxehti përvëlues që ka pushtuar këtë verë vendin tonë kërkojnë një sistem vaditës efikas që bimët dhe pemët bujqësore të mos thahen e prodhimi të mos shkojë dëm.
Sipas Përgjegjësit të Sektorit të Vaditjes e Kullimit në Drejtorinë e Bujqësisë të Bashkisë Mat, Asllan Progja, këtë vit, falë edhe mbështetjes së siguruar nga kryebashkiaku Agron Malaj, është arritur të shtohet sipërfaqja e tokave bujqësore të vëna nën ujë deri në 70 %, me objektivin që vitin e ardhshëm kjo të shkojë në 100 %.
Kujdes është treguar në tetë njësitë administrative të kësaj bashkie, duke vënë në funksion vepra që nuk kanë vaditur prej shumë vitesh.