Festë në ‘Elbasan Arena’, teksa Kombëtarja ka mundur me rezultatin 1:0 Hungarinë. Futbollisti 19-vjeçar, Armando Broja i ka dhuruar Shqipërisë golin e shumëpritur në ndeshjen me Hungarinë, një fitore jetike për kualifikueset e botërorit “Katar2022”. Goli erdhi në minutat e fundit të takimit nga i riu Armando Broja i cili shënoi falë një aksioni shumë të bukur personal dhe një gjuajtje të shkëlqyer. Një fitore kjo mëse e merituar për kuqezinjtë e Edi Rejës.
Kombëtarja shqiptare u shfaq në formë të mirë në fushë, ku e vetmja gjë që mungonte, goli, erdhi në minutat e fundit të ndeshjes
Në minutën e 87-të, Armando Broja, mposhti portierin kundërshtar, duke çuar peshë zemrat e tifozëve shqiptarë në ‘Elbasan Arena’. Është goli i parë në histori që kombëtarja i shënon ekipit Hungarez.
Kjo fitore e ka çuar Shqipërinë në kuotën e 9 pikëve, duke mbajtur përkohësisht vendin e dytë.
Ndeshja u zhvillua në “Elbasan Arena”, ku pas më shumë se një viti e gjysmë, tifozët u rikthehen në stadium për të ndjekur skuadrën kombëtare. Mijëra tifozë iu drejtuan sot Elbasanit, ndërsa kuqezinjtë nuk i zhgënjyen, duke mbajtur ende gjallë ëndrrën e botërorit.