Bebe Rexha nuk i harron asnjëherë rrënjët e saj dhe na ka bërë përherë krenarë anë e mbanë botës me talentin e saj. Mbrëmjen e djeshme artistja është kthyer pas në kohë duke na ëmbëlsuar me kujtimin e saj të bukur nga fëmijëria së bashku me stërgjyshen!
Ajo ka publikuar në Instagram një fotografi, ku shfaqet bashkë me stërgjyshen e saj, në kohën kur ishte vetëm 4 vjet.
“Unë me stërgjyshen time në Gostivar, Maqedoni, kur isha 4 vjeç”, ka shkruar Rexha krahas fotografisë.
Ajo e di se çdo sukses nuk do të ishte i mundur pa ata që i qëndruan pranë që në hapat e parë!
Mes shumë komenteve, ai që ka marrë më shumë vëmendjen ishte ai i një ndjekëses, e cila i ka shkruar:
“Hey Bebe. E di që të mungojnë turshitë dhe ajvari.”
Ky koment nuk ka mbetur pa rënë në sy të artistes, e cila ka zbuluar se porosit ushqimin tradicional shqiptar dhe në Los Angeles.
“Unë porosis ajvar në shtëpinë time në Los Angeles!”- shkruan ajo.
Më herët, e pyetur rreth kulturës dhe traditave shqiptare, Bebe është shprehur në një intervistë se është fanatike e gatimeve tradicionale.
“O Zot i madh, unë e dua ushqimin shqiptar. Me të vërtetë i dua të gjitha ato që përfshihen në kuzhinën tonë tradicionale. Mua më pëlqen shumë ‘bureku’ dhe ‘fasulet’ dhe thjesht e dua shumë ushqimin shqiptar, por ‘bureku’ është i preferuari im. Pastaj më pëlqen ‘flija’, kështu që ato janë të preferuarat e mija dhe ne gjithmonë i bëjmë ato gjatë gjithë kohës në shtëpinë time. Unë di t’i gatuaj. Gjatë karantinës në të vërtetë po mësoja si ta gatuaja. Unë nuk bëra një punë edhe aq të shkëlqyeshme, por ishte në rregull. Por ju e dini, unë gatuaj pjesën më të madhe të kohës vetë, dhe vërtetë e dua ushqimin shqiptar. Unë e dua gatimin, si dashurinë”.