Katër deputetë të rinj të LSI janë ulur sot për herë të parë në Kuvend, duke zënë vendin e atyre që dogjën mandatet.
Deputetët e rinj u betuan sot, pasi pranuan karrigen e deputetit, ndërsa jashtë Kuvendit po zhvillohej protesta e paralajmëruar e opozitës.
Deputetët e PS, Pjerin Ndreu dhe Xhemal Qefalia, kanë gjetur kohën që gjatë seancën plenare të bënin edhe foto, të cilët i kanë postuar në rrjetet sociale.
Fotoja e mëposhtme e dy socialistëve nuk ka kaluar pa u vënë re nga ish-kolegu i tyre, Piro Lutaj, aktualisht drejtor i Zyrës së Përmbarimit, i cili ka komentuar duke u lënë edhe porosinë: “Ma mbani afër Ylli Shehun”.
Kujtojmë se Ylli Shehu është një nga 4 deputetët që u betuan sot në Kuvend, si përfaqësues të LSI.
Nuk dihet nese porosia e Lutajt është ironike, apo jo, por kujtojmë po ashtu se Shehu ishte deputet për herë të parë në 2013-ën, nën siglën e Partisë Republikane, ndërsa pas zgjedhjeve vendore të vitit 2015, ai kaloi me LSI-në.
Ndërkohë në zgjedhjet e 2017-ës, ai u rendit në listën e kandidatëve për deputetë në qarkun e Tiranës krah LSI-së.
