Mes debatit dhe çarjes së bazës për shkak të përjashtimit të Sali Berishës, situata brenda PD-së nuk është aspak e qetë. Megjithatë Lulzim Basha është fokusuar në strategjinë kundër qeverisë duke mos i hedhur, sikur tha ai pak ditë më parë, “benzinë zjarrit” të konfliktit brenda shtëpisë.
Pika e parë në të cilën u ndal lideri demokrat ishte rritja e çmimit të bukës. Hapi i parë që do të ndërmarrë opozita është kërkesa për uljen e TVSH-së për produktet e shportës. “Situata ekonomike është shumë e rendë.
Rritja e çmimeve ka bërë që shumica e familjeve të mos përballojnë dot as shpenzimet për ushqimet bazike. Prandaj si masë emergjence do të kërkojmë uljen e TVSH-së për produktet e shportës, nga 20 në 6%. Buxheti, që sot përdoret për klientët dhe oligarkët e pushtetit, duhet të orientohet një orë e më parë nga nevojat e familjeve shqiptare” tha ai.
Beteja politike kundër qeverisë nis me ngritjen e tre komisioneve parlamentare. Kryedemokrati nuk heq dorë nga ajo që e cilëson “masakër zgjedhore” e 25 prillit duke kërkuar ngritjen e një komisioni hetimor. Komisioni i dytë që opozita kërkon është për cështjen Becchetti dhe i treti për inceneratorët.
“1-Komision hetimor për Masakrën Zgjedhore, qe u konfirmua edhe nga raporti i OSBE/ODIHR. Parësore për këtë komision hetimor do të jetë vjedhja e të dhënave private dhe personale të shqiptarëve, keqpërdorimi i aseteve dhe funksioneve publike, abuzimi me fondet e rindërtimit për qëllime elektorale, abuzimi me legalizimet në këmbim të votës. Punësimet e paligjshme në administratën publike dhe blerjen e votës.
2- Komision hetimor për çështjen Becchetti. Lufta personale e Edi Ramës me sipërmarrësin italian do t’u kushtojë qytetarëve më shumë se 120 milionë euro.
3-Komision hetimor për Inceneratorët, një aferë mafioze, kriminale që përfshin zyrtarët më të lartë të shtetit shqiptar. Kallëzimet tona penale vazhdojnë të zënë pluhur nëpër prokurori” deklaroi Basha.
Në mbledhjen e kaluar, Lulzim Basha ngriti një strukturë të re për denoncimet e qytetarëve, të cilën ia besoi deputetit Ervin Salianji. Në vazhdim pritet që të ketë hapa të tjerë konkretë nga opozita mbi strategjinë kundër qeverisë.