Kreydemokrati Lulzim Basha shkarkoi mbrëmë Flamur Nokën nga posti i Nënkryetarit të Komisionit Parlamentar të Sigurimit.
Pas vendimit të Bashës, reagoi edhe deputeti Flamur Noka. Në një lidhje e me emisionin “Spotlight” të Alban Dudushit, Noka tregoi se si kreu i PD-së i komunikoi vendimin për shkarkimin nga posti.
“Më telefonoi pasi doli në media. Më kërkoi takim, por unë jam larg dhe nuk mund të shkoja kështu që u zhvillua një bisedë telefonike. Më komunikoi vendimin e tij. Unë i bëra me dije që të drejtën për të thënë të vërtetën e kam fituar në vitin ’90, kur jam ngritur së bashku me studentë të tjerë për të përmbysur regjimin. Dhe atë të drejtë, nuk ma mohon dot, askush. Unë sot, para shqiptarëve nuk kam thënë asgjë më shumë se të vërtetën e asaj mbledhje që u zhvillua mbrëmë. Unë kam insistuar në çdo mbledhje të Kryesisë së grupit parlamentar që të protokollohen dhe të regjistrohet çdo diskutim. Është periudhë kritike për fatin e Partisë Demokratike, ndaj ne diskutojmë gjëra të rëndësishme për fatin e saj. Çfarë ka ndodhur? As ka dashur kush t’ja dijë, se zoti Basha ka frikë nga e vërteta,” tregoi Noka.
Demokrati e cilëson vendimin e Bashës si të paligjshëm dhe nul, teksa thekson se shkarkimin e tij nuk e vendos dot Basha.
“Unë, një gjë i them Lulzim Bashës, -Je kryetar në ikje, je fallco dhe je munduar gjithmonë të prodhosh lajme fallco. Prodhon mashtrim. Ky është një vendim fallco, është vendim i paligjshëm, sepse mua nuk më shkarkon dot Lulzim Basha. Preventivën për shkarkimin tim e kanë institucionet e partisë dhe Lulzim Basha, siç merr vendime antikushtetuese, antistatutore, merr një vendim nul,” deklaroi Noka.
Noka nuk i ka ndalur akuzat e hedhura mbi Bashës duke e rikujtuar edhe njëherë deklaratën e kryedemokratit i cili e quajti ‘llum’ një pjesë të PD-së gjatë qeverisjes së Berishës.
“Nuk ka guxuar askush të quajë ‘llum’ qeverisjen e Partisë Demokratike. Ju të gjithë jeni dëshmitarë që është qeveria më e suksesshme që kur është themeluar shteti shqiptar. Dhe aq më tepër që ju keni qenë më jetëgjati në atë qeverisje,- i thashë, i bie që ju keni qenë ‘kryellumi’,” tha Noka.