Qeveria duket se ka një projekt përsa i përket dy satelitëve shqiptarë në hapësirë, për të cilët kryeministri Edi Rama foli dje në Kuvend.
Në prononcimin për mediat ai sqaroi edhe këtë projekt.
“Do ketë satelit dhe do ketë shpejt për të forcuar kontrollin në territorin e saj, jo vetëm satelitë po drone inteligjentë që do të na ndihmojë për ta çuar vendin në nivel tjetër nga aspekti i administrimit të territorit të vetë dhe këto janë mjete të një teknologjie të re që garantojnë një monitorim të territorit për shumë gjëra, që nga kufijtë, tek ndërtimet, tek monitorimi lidhur me informacionin që duhet strukturave të shtetit për luftën kundër trafiqeve, patjetër për të çuar deri në fund përpjekjet për të izoluar plotësisht territorin e kultivimit të lëndëve narkotike, për të mbjellat e bujqësisë, për shumë shumë çka, por natyrisht dhe për të luftuar në mënyrë cilësore krimin e organizuar duke pasur kapacitete monitoruese të paimagjinueshme dhe patjetër duke pasur në dispozicion këtë arsenal për të pasur parasysh marrëdhëniet që zhvillohen në territor dhe që shumë herë komprementohen nga punonjës policie të korruptuar. Vende të tjera të zhvilluara e bëjnë këtë gjë dhe e mira e kësaj kohe të teknologjisë së lartë, është se nuk ka nevojë të jesh vend super i zvhilluar për të bërë kapërcim epokal duke vënë në dispozicion mjete të kësaj natyre që kanë një sofistikim që i kapërcen kufijtë e imagjinatës”, tha Rama.