Detaje të reja janë bërë publike nga ekzekutimi që tronditi Peqinin ditën e sotme. Anëtari i bandës së Lushnjës, Alban Semaku i cili u gjet i vdekur pranë lumit Shkumbin, është ekzekutuar në mënyrë barbare.
Në trupin e tij janë gjetur 4 predha plumbash, një në kokë dhe 3 në shpinë të cilat dyshohet se i përkasin një pistolete të kalibrit 9mm.
Të njëjtat burime nga grupi hetimor bëjnë me dije se 38-vjeçari ka marrë një plumb nga pjesa e pasme e kokës, që më pas i ka dalë nga syri i djathtë. Ndërkohë që kokën ia kishin mbështjellë me një qese të zezë. Paraprakisht dyshohet se viktima ishte marrë peng, torturuar, vrarë dhe më pas hedhur pranë lumit.
Nga ana tjetër drejtuesi i Prokurorisë Keshnik Ajazi dhe një grup prokurorësh janë kthyer sërish në vendin e ngjarjes për të ndërtuar edhe njëherë dinamikën e krimit.