Kreu i grupit parlamentar të PS-së, Taulant Balla tha për mediat se PS është e hapur të diskutojë çdo propozim, pas zbardhjes së amendamenteve të demokratëve për vetingun e politikanëve, reformën zgjedhore dhe atë territoriale.
“Ne jemi 100% të hapur dhe plotësisht dakord që të diskutojmë çdo diskutim që vjen nga opozita, do të doja ta përshëndesja këtë qasje të re të opozitës parlamentare. Për të qenë korrekt janë shumë çështje që duhen diskutuar, dhe sikurse e thashë në fillim dhe po e përsëris ne do ti shohim dhe do ti diskutojmë me vëmendje.
Unë e thashë dhe në seancën e kaluar, kur miratonim ngritjen e Komisionit Hetimor për zgjedhjet, do të ngrejmë dhe një Komision për Reformën Zgjedhore.
Dua të theksoj që çështja e ndryshimeve Kushtetuese për zgjatjen e afateve të Komisionit të Vetingut nuk është një çështje e jona, por një çështje shumë teknike për të garantuar një proces të njëjtë për të gjithë gjyqtarët dhe prokurorë”, tha Balla.
