Një tërmet me magnitudë 4.5 Rihter u regjistrua mëngjesin e sotëm në zonën e Bulqizës, ndërsa para dhe pas goditjes kryesore kishte edhe disa lëkundje më të vogla.
Në 24 orët e fundit vetëm në zonën e Bulqizës, sipas IGJEUM-it, janë shënuar gjashtë lëkundje sizmike.
Por si shpjegohet kjo?
Sipas sizmologut Rrapo Ormeni, nuk ka asgjë për t’u shqetësuar.
“Kjo e sotmja duket se është një goditje kryesore. Tërmetet janë dy tipologji, goditja kryesore ka para dhe pasgoditje. Shumica janë pasgoditje. Është tipi i tërmetit që shoqërohet me paragoditje. Janë procese normale që ndodhin. Ky tërmet është normal, i vogël”, tha ai.
Sizmologu qetësoi qytetarët kur tha se tërmeti i regjistruar sot në Bulqizë nuk ka lidhje me atë që ndodhi në Durrës më 26 nëntor të dy viteve më parë: “Nuk ka lidhje me zonën e Durrësit. Zona e Bulqizës është e dalluar, bie çdo vit një tërmet i kësaj madhësie”.
Muajin e fundit, edhe Greqia është goditur nga disa tërmete të fuqishme, por sizmologu thotë se “as ato nuk kanë lidhje, pasi Greqia është në pllakën e Egjeut, ndërsa Shqipëria në atë të Adriatikut”.