Qeveria do të ndërhyjë në menaxhimin e situatës së ujësjellësave tha kryeministri Edi Rama në takimin me kryebashkiakët lidhur me problematikën pas ngjarjes së ndodhur në Krujë.
Ai tha se abuzimi më i madh dhe humbjet në rrjet nuk bëhen nga abonentët familjarë por nga bizneset e mëdha. “Abuzimin më të madh e bëjnë bizneset, e bëjnë hotelet, e bëjnë ata që kanë më shumë e jo ata që kanë më pak. Kjo gjendje është në kufijtë e absurditetit. Nga MIE do të ndërhyhet menjëherë për të kthyer tendencën duke ndërtuar një proces ndërveprimi me partnerët dhe me kryetarët e bashkive për të riorganizuar komplet të gjithë sistemin, me themel. Cilido që nuk do të dojë të kuptojë se një ujësjellës që nuk mbulon as pagat, as sigurimet shoqërore dhe që mban me borxhe lista të tëra punonjësish është pasqyra më dëshpëruese e papërgjegjshmërisë”, tha ai.
Rama tha se do të bëhet skanim i të gjitha burimeve njerëzore të ujësjellësave në bashkëpunim me partnerët.
“Skanim të të gjitha burimeve njerëzore të ujësjellësave. Çfarë profili dhe çfarë kapacitetesh menaxheriale kanë të gjithë shefat e ujësjellësave nëpër Shqipëri. Sa janë në profilin e tyre punonjësit? Sugjerimi im për të gjithë ju do ishte të merrnit masat vetë se sa gjithë këto pasqyra të tregojnë gjëra që do të mbeten në historinë e humorit e satirës shqiptare. Ti merrni masat vetë”, paralajmëroi ai.
Abuzim me votën e popullit e konsideroi Rama situatën aktuale me ujësjellësat.