Të paktën 130 banorë të njësive administrative Bulqizë, Gjoricë, Zerqan, Shupenzë, Trebisht, Fushë Bulqizë, Ostren e Martanesh janë ankuar pranë bashkisë Bulqizë se banesat e tyre janë dëmtuar nga termeti i të premtes.
Zyrtarë të pushtetit lokal u shprehën se nesër nisin punën në terren pesë grupe verifikimi, për të qartësuar situatën e krijuar nga lëkundjet e tërmetit 4.7 ballë.
Kryetari i bashkisë Lefter Alla ka inspektuar një pjesë të objekteve të dëmtuara dhe ka kërkuar nga Shtabi i Emergjencave Civile dhe grupet e punës të verifikojnë me korrektësi çdo ankesë të qytetarëve.
Nga të dhënat paraprake të paktën 30 banesa kanë dëmtime të mesme dhe pjesa tjetër dëmtime të lehta. Njësia administrative më e dëmtuar është Zerqani me 37 banesa, pastaj vijnë Fushë Bulqiza me 27 dhe Shupenza me 25 banesa.