Në takimet që zhvilloi sot në Peshkopi, Kastriot dhe Arras, drejtuesi politik për Qarkun e Dibrës Ulsi Manja kërkoi nisjen e menjëhershme të analizave reale për shkaqet e humbjes, nivelin e përgjegjësisë të kujtdo drejtuesi, si dhe paraqiti strategjinë për t’u rikthyer tek fitorja. “Ndëshkim dhe vlerësim”, kjo sipas Manjës do të jetë motoja e tij; e para për matrapazët dhe servilët e flamujve të partive që shkaktuan rënien në zgjedhjet e fundit, dhe e dyta për njerëzit e ndershëm dhe punëtorë.
“Çdokush që ka keqpërdorur besimin e Partisë Socialiste dhe sidomos besimin e qytetarëve do të ndëshkohet politikisht, por edhe ligjërisht nëse ka abuzuar me detyrën. Duhet të ndërtojmë strukturat njerëzore brenda partisë, bazuar tek dhjetëra, qindra e mijëra dibranë të ndershëm e të përkushtuar”, ka thënë Manja, duke paralajmërur në këtë mënyrë një “krehje” jo vetëm të strukturave partiake në këtë qark, por edhe më shumë.
Në 35 njësitë administrative të rretheve Mat, Dibër e Bulqizë ka nisur analiza e zgjedhjeve të 25 prillit. Në këto analiza është angazhuar drejtuesi politik i Qarkut Dibër Ulsi Manja, deputetët Krashi e Mara, kryetarët e 4 bashkive si dhe kryetarët e Asambleve Socialiste të bashkive Dibër, Mat, Bulqizë e Klos. Në përmbyllje të tyre do të ketë një raport të detajuar për arritjet, dobësitë, të deleguarit, të zgjedhurit dhe të emëruarit në strukturat drejtuese të PS-së në këtë rajon.