Një muaj më parë deputetët e opozitës i kërkuan Kuvendit që mbledhjet e komisioneve parlamentare të realizoheshin me prani fizike.
Sipas vendimit të Konferencës së Kryetarëve më 4 tetor, deputeti duhet të dorëzojë pranë sekretarisë së komisionit certifikatën e vaksinimit ose testin PCR negativ të kryer jo më vonë se 48 orë përpara fillimit të mbledhjes.
Tirananews.al kontaktoi në mënyrë zyrtare zyrën e shtypit të Kuvendit ku kërkoi informacion lidhur me numrin e deputetëve që janë të pavaksinuar.
Nga 140 deputetë që ka Kuvendi, sipas përgjigjes zyrtare vetëm tetë prej tyre janë të pavaksinuar.
“Në përgjigje të kërkesës suaj për informacion, drejtuar Kuvendit të Shqipërisë, datë 06.10.2021 dhe në ligjin nr. 119/2014 “Për të drejtën e informimit” në të cilën kërkoni informacion mbi vaksinimin e deputetëve, ju informojmë se nga 140 deputetë, të mandatuar për “Legjislaturën e X”, të Kuvendit të Shqipërisë, janë të pavaksinuar vetëm 8 (tetë) deputetë. Referuar të dhënave, deputetët në fjalë janë brenda afatit kohor të bërjes së vaksinës së rekomanduar”, thuhet në përgjigjen e institucionit të Kuvendit.
Këta tetë deputetë prej një muaji tashmë sipas vendimit të Konferencës së Kryetarëve para çdo mbledhje komisioni paraqesin testin PCR negativ të kryer jo më vonë se 48 orë nga fillimi i mbledhjes./ A.B- Tirananews.al
