Kryetari i socialistëve të Shijakut, Elton Arbana, ashtu si vite më parë, edhe këtë 8 mars organizoi një udhëtim në Korçë për 80 gra. Ndërsa kryetari i PS-së Bulqizë, Lefter Alla, sponsorizoi një aktivitet të grave të këtij qyteti. Ky është kthyer në një ritual të përvitshëm nga ana e kryetarëve Arbana e Alla, pasi prej pesë vitesh organizohen aktivitete të tilla për gratë e Shijakut e Bulqizës.
Të pranishme në udhëtim ishin edhe pjesëtare nga shoqatat jo qeveritare që ushtrojnë aktivitetin në Bashkinë e Shijakut.
“Gratë janë kontribuese dhe faktorë të rëndësishëm. Ato duan një jetë më të mirë për veten dhe një të ardhme më të mirë për vendin. Forcën e gruas e shoh çdo ditë te nëna dhe bashkëshorja ime”,- tha Arbana gjatë takimit.
Në këtë takim u diskutua gjithashtu për përvojat dhe sfidat e grave në fushën e barazisë gjinore, për edukimin e grave dhe vajzave, për fuqizimin ekonomik të tyre dhe krijimin e mundësive për punësim.
“Duhet të ndërgjegjësohet e gjithë shoqëria, për të pasur sa më shumë gra të arsimuara”,- tha kreu i PS-së së Shijakut.
Edhe kryetari i socialistëve të Bulqizës, Lefter Alla organizoi një aktivitet mbreslënës në këtë qytet. Qindra gra kaluan momente të bukura mes këngëve e valleve tradicionale.