Presidenti Nayib Bukele tha se El Salvador planifikon të ndërtojë “Qytetin e Bitcoin” të parin në botë, të mundësuar nga bonot e kriptomonedhave dhe vullkani Conchagua.
“Bitcoin City “do të përfshijë gjithçka, zona të banuara, zona tregtare, shërbime, muze, argëtim, aeroport, port, hekurudhë”, – tha Bukele në Konferencën e Bitcoin dhe Blockchain të Amerikës Latine.
Salvadori, i cili ka përdorur dollarin amerikan për dy dekada, ishte vendi i parë në botë që legalizoi Bitcoin si mjet ligjor këmbimi.
Bukele tha se vullkani Conchagua do të “fuqizojë” të gjithë qytetin dhe gjithashtu do të “fuqizojë” minierat.
“Minimi” i Bitcoin është procesi me të cilin krijohet bitcoin i ri duke përdorur kompjuterë që zgjidhin probleme komplekse matematikore , një proces që kërkon sasi të mëdha energjie.
Në Salvador, një pjesë e asaj energjie vjen nga një fabrikë gjeotermale që furnizohet nga vullkani Tecapa.
Bukele tha se qyteti fillimisht do të furnizohej me energji nga uzina Tecapa përpara se qeveria e tij të ndërtonte një impiant të ri gjeotermik të furnizuar nga Conchagua.
“Emetime zero CO2. Ky është një qytet plotësisht ekologjik,” – i tha Bukele të pranishmëve.
Për të financuar projektin, Salvador do të emetojë 1 miliard dollarë “obligacione bitcoin” në vitin 2022, sipas Samson Mow, shefi i strategjisë së Blockstream, një ofrues i teknologjisë blockchain.
Gjatë konferencës në skenë me Bukele, Mow tha se gjysma e “obligacioneve vullkanike” do të investohej në bitcoin dhe gjysma tjetër në infrastrukturë.
“El Salvador do të jetë qendra financiare e botës,” tha Mow.
Bukele tha se Bitcoin City do të ngarkojë vetëm tatimin mbi vlerën e shtuar (TVSH).
“Ne do të kemi zero tatim mbi të ardhurat. Zero për qind përgjithmonë. Zero taksë mbi fitimet kapitale… zero taksë në pronë, zero taksë mbi pagat,”- tha presidenti Bukele duke mos përmendur afatin kohor për ndërtimin e qytetit.