Shtëpia që jeni duke parë në këto momente do të na kthejë 20 vjet pas. Kjo është nënë Olimbia që endet mes dhimbjes së humbjes së djalit. Çdo ditë zgjohet me shpresën se do të mësojë të vërtetën. Pse e vranë djalin e saj 18 vjeçar në një burg të të miturve në Greqi.
Edmond Gjoni në atë kohë vetëm 18 vjeç emigron pa dokumenta në shtetin fqinj. Ai kërkonte të siguronte disa para për të ndërtuar një shtëpi për vetë dhe prindërit. Por ëndrra e tij do të ndërpritej në mes nga një plumb që përshkoi qafën e tij.
Nëna e tij kujton natën e fundit që i biri fjeti në shtëpi. Mes dhimbjes ajo tregon krevatin se ku u shtri para se të merret rrugën e mërgimit.
“Natën e fundit fjeti te ky krevati këtu, u ngrit herët në mëngjes dhe iku. Pas disa ditësh na morën në telefon që mbërriti. Kishte filluar punë atje, punonte me disa elektricistë, janë shokë të mirë thoshte. Na merrte gjithmonë, na telefononte. Nga fundi shkurtit, fillimi marsit kemi shkuar një herë te posta dhe nuk na ka dalë”, u shpreh Olimbi Gjoni, nëna e Edmond Gjonit
Vetëm pak ditë më vonë Olimbia do të mësonte se i biri ishte në burg.
“Më tha që jam brenda, ju kam dërguar një letër që ta dini se si është puna. Thuaji dhe babit se do vijë nga gushti ose shtatori” u shpreh Olimbi Gjoni, nëna e Edmond Gjonit
Në fakt nënë Olimbia se mori kurrë letrën që i dërgoi i biri. Edhe jashtë kamerës ajo pyet me dëshpërim se nëse ekziston ndonjë mundësi që të gjejë atë letër që i ka dërguar djali./Top story