Ndërprerja e shërbimeve Microsoft 365, e cila që prej mbrëmjes së së enjtes ka bërë të paarritshme platformën Outlook dhe programe si Teams, po shkakton probleme edhe në sektorin e transportit ajror. Edhe pse deri më tani bëhet fjalë kryesisht për vështirësi në menaxhimin e proceseve të zakonshme administrative, shqetësimet mund të ndihen veçanërisht në komunikimin mes kompanive ajrore dhe pasagjerëve, lidhur me rezervimet, check-in-in online dhe trajtimin e ankesave.
Të premten në mëngjes, Eurocontrol, agjencia përgjegjëse për koordinimin e trafikut ajror mbi Evropë dhe zonat përreth saj, u ka dërguar kompanive ajrore një njoftim urgjent. Për shkak të ndërprerjes globale të Microsoft 365, qendra e saj në Bruksel nuk është në gjendje të marrë apo të dërgojë email-e. Deri në zgjidhjen e problemit, Eurocontrol ka kërkuar që çdo komunikim me të të kryhet vetëm përmes telefonit.
Sipas të dhënave të Downdetector, defekti ka gjeneruar dhjetëra mijëra raportime në më shumë se 70 vende të botës. Megjithatë, sipas ekspertëve të sektorit, problemi nuk prek sistemet operative të fluturimeve dhe as kontrollin e trafikut ajror. Ndikimi është përqendruar kryesisht te kanalet e komunikimit dhe shërbimet e asistencës për klientët.
Situata paraqitet e ndryshme nga një kompani ajrore në tjetrën. Në Indi, kompanitë IndiGo dhe Akasa Air kanë paralajmëruar pasagjerët se për momentin nuk janë në gjendje të marrin email-e, siç bëhet e ditur përmes njoftimeve në profilet e tyre zyrtare në rrjetet sociale. Ndërkohë, Air India ka ridrejtuar përkohësisht mesazhet dhe ka siguruar se operacionet vijojnë normalisht. Nga ana tjetër, SpiceJet ka anuluar tre fluturime dhe ka raportuar vonesa në disa të tjera.
Për kompanitë ajrore evropiane, vështirësitë lidhen kryesisht me trajtimin e ankesave, ndryshimin e itinerareve dhe vijimin e komunikimit të brendshëm apo atij me partnerët. Sipas vlerësimeve të sektorit, rreziku nuk lidhet me ndalimin e ngritjes së avionëve, por me rritjen e ngarkesës në qendrat e shërbimit ndaj klientit dhe në aplikacionet e kompanive ajrore, të cilat mund të pësojnë gjithashtu ndërprerje.
Për pasagjerët, kjo mund të nënkuptojë vonesa ose mungesë të njoftimeve për ndryshimet e orarit të fluturimit, ndryshimin e portës së imbarkimit apo anulimet, të cilat zakonisht dërgohen përmes email-it.
Për këtë arsye, kompanitë ajrore u rekomandojnë udhëtarëve të kontrollojnë statusin e fluturimit përmes aplikacioneve dhe faqeve zyrtare të kompanive, si dhe, kur është e mundur, përmes tabelave informuese në aeroport.
Ndërkohë, në rastet kur anulimet e fluturimeve shkaktohen nga kjo ndërprerje informatike, nuk parashikohet kompensim financiar për pasagjerët, pasi situata konsiderohet si një rrethanë e jashtëzakonshme.