Ministrja e Shtetit për Rininë dhe Fëmijët, Bora Muzhaqi zhvilloi sot një takim me studentë të Universitetit “Aleksandër Xhuvani” në Elbasan.
Gjatë takimit me studentët ministrja tha se të rinjtë diskutuan mbi problematikën e tarifave të larta, dhe nevojën për bursa më të larta, si dhe stazh të paguar.
Po ashtu, u diskutua për nevojën për një orientim më të mirë të tregut të punës me arsimin, si dhe nevojën për më shumë mundësi argëtimi dhe hapësira për të rinjtë, për t’i larguar ata nga veset e dëmshme, si dhe për të zhvilluar talentet e tyre.
“Studentët kërkuan më shumë mundësi punësimi për të rinjtë pa eksperiencë pune dhe së bashku diskutuam për mundësitë për praktika të ndryshme pune. U ngritën çështje me shumë rëndësi, siç është kujdesi për shëndetin mendor të të rinjve, si dhe mundësinë për qendra të ndryshme me akses te psikologu për raste të të rinjve me depresion, apo të rinjtë që bullizohen”, tha Muzhaqi.
Ministrja tha se u diskutua edhe lidhur me nevojën për të përfshirë gjuhën shqipe si lëndë në universitet, për të pasur një brez që flet dhe shkruan saktë gjuhën, apo edhe nevojën për redaktorë në institucionet publike.