Bashkimi me “Foltoren” e ish-kryeministrit Sali Berisha nuk është pritur mirë nga vjehrra e Floriana Garos.
Ish-kryetarja e Aleancës Kuqezi, Lumturi Ratkoceri, ka komentuar vendimin e marrë nga Garo për mbështetjen e Berishës, e cila është drejtoreshë e Komunikimit e “Foltores”.
Në një intervistë për “Top Talk”, Ratkoceri tha se të gjithë ata që shkojnë pas Berishës janë të manipuluar, pasi gjithmonë, sipas saj, kjo është gjëja më e mirë që di të bëjë ish-kryeministri Sali Berisha.
“Me nusen time bëmë një pakt, se jemi si shoqe. Nuk do të diskutojmë për politikën. Kjo është demokracia, toleranca. U përpoqa t’ia ndryshoj mendjen. Argumenti i saj është: kush mundet ta bëjë?
Fakti që Rama është bërë i plotfuqishëm është për faj të Bashës. Kjo mungesë shprese i shtyn të rinjtë, o të emigrojnë, ose ata që janë këtu të angazhohen për ndryshimin.
Berisha, kur do të manipulojë njerëzit duke u dhënë shpresë, di ta bëjë. Di të ngjallë shpresë, aty ku nuk ka shpresë. Është manipulator i jashtëzakonshëm.
Nusja ime dhe të tjerë janë idealistë. Nuk shohin rrugë tjetër. Ideja e të gjithëve është që, nëse riformohet PD, kanë shansin ta rrëzojnë Ramën”, u shpreh zonja Ratkoceri.