Një media që njihet për mbështetjen e ish-kryeministrit Sali Berisha shkroi se Lulzim Basha është takuar në një restorant në kryeqytet me kryebashkiakun Erion Veliaj dhe kreun e grupit parlamentar të PS, Taulant Balla.
Por përmes një reagimi zyrtar, PD sqaron se kryetari Basha, i shoqëruar nga bashkëshortja e tij, nuk kanë qenë në asnjë takim apo darkë në hotel “Prestige”, por ishin atje për ngushëllim në familjen Hysenbelliu.
“Shpifjet e Syrit të Sali Berishës vazhdojnë edhe sot, me lajme të sajuara turpshëm dhe që synojnë të fshehin të vërtetën që sot e di çdo demokrat, që Berisha po tenton të dëmtojë PD për interesin e tij personal.
Kryetari i Partisë Demokratike z. Lulzim Basha, i shoqëruar nga bashkëshortja e tij, nuk kanë qenë në asnjë takim apo darkë në hotel ‘Prestige’, por kanë qenë atje për ngushëllim në familjen Hysenbelliu, për shkak të ndarjes nga jeta të kryefamiljares së tyre të shtrenjtë. Degradimi i një media personale për hallin personal të Sali Berishës shfaq edhe njëherë përpara çdo demokrati dhe qytetari shqiptar, se vendimi i Partisë Demokratike për të zgjedhur të ardhmen dhe për të lënë pas të shkuarën, është interes madhor i demokratëve dhe Shqipërisë”, thuhet në njoftimin e PD.