Nuk ka asnjë kallëzim për vjedhje në dy muajt e fundit në fshatin Kasallë të Kamzës.
Kështu thotë policia e Tiranës në një sqarim pas publikimit të një kronike në media ku banorë të zonës ngritën shqetësimin se fshati është vënë në shënjestër të hajdutëve.
“Në lidhje me një video të publikuar në media, e cila bën fjalë për një ankesë të disa banorëve të fshatit Kasallë, ku shprehin shqetësimet se në këtë zonë, brenda një afati kohor prej 10 ditëve, kanë ndodhur disa vjedhje, dhe për këto vjedhje pretendojnë se nga shërbimet e Komisariatit të Policisë Nr. 5 nuk është marrë asnjë masë, ju sqarojmë se:Nisur nga kronika e transmetuar me datë 25.12.2021, shërbimet e Komisariatit të Policisë Nr. 5 menjëherë kanë shkuar në fshatin Kasallë dhe kanë marrë takim me personat që janë intervistuar nga kjo media. Këta shtetas janë pyetur dhe intervistuar dhe ka rezultuar se asnjë prej tyre nuk ka patur raste të vjedhjeve të banesave apo pronave të tyre, por kanë dëgjuar se në këtë zonë kanë ndodhur disa vjedhje” njofton policia.
Më tej në komunikatë sqarohet se nga verifikimet e bëra rezulton se gjatë dy muajve të fundit, nuk ka asnjë kallzim apo njoftim nga ndonjë banor i zonës Kasallë për vepra penale që cënojnë pronën dhe pasurinë.
“Policia e Tiranës kërkon mirëkuptimin e mediave, që përpara publikimit të çdo rasti, të kërkojnë informacion pranë Drejtorisë Vendore të Policisë Tiranë duke ju garantuar transparencë të plotë të çdo rasti” përfundon deklarata.