Deputeti dhe ish-ministri Brendshëm, Flamur Noka, ka guxuar pak si tepër. Ai thotë që “nëse më 5 janar (2022), deputeti Basha nuk i hap rrugë rivendosjes se demokracisë në PD, por tenton të vazhdojë ta mbajë peng PD për llogari të Ramës, atëherë më 8 janar do të thirren demokratët e Shqipërisë të bëjnë përmbaruesin paqësor të vullnetit të tyre të shprehur më datë 11 dhjetor në Kuvendin e PD-së dhe të datës 18 dhjetor me referendum”.
Pra, data 8 janar, sipas ish-ministrit të Brendshëm, do jetë dita kur demokratët marrin selinë blu në duart e tyre, pavarësisht se Roland Bejko i krahut të Bashës deklaroi se “do kemi mbrojtje policinë atë ditë”, duke aluduar dhe për marrjen e Kryeministrisë po atë ditë.
Anëtari i Këshillit Kombëtar të PD dhe sekretari për Pushtetin Vendor e Decentralizimin (i palës së Bashës), Roland Bejko i pyetur nëse do të jetë në zyrat qendrore të PD për ta mbrojtur kur të shkojë Berisha dhe përkrahësit e tij, tha: “Unë roje s’jam, as gardian. Nëse sulmohet selia blu nga njerëzit e Berishës, ka kush e mbron atë. Na mbron Policia”.
Berisha është shprehur se pranvera e vitit 2022 do jetë me valë protestash deri në detyrimin e kryeministrit Rama për të shkuar në zgjedhje të parakohshme parlamentare në muajin qershor ose korrik 2022.