Rregullatori i Bashkimit Evropian për barna ka njoftuar se po shqyrton nëse do të autorizojë për përdorim dozën përforcuese të Pfizer/BioNTech për fëmijët 12-15 vjeç.
Në njoftimin e Agjencisë Evropiane të Barnave (EMA) u tha po ashtu se shqyrtimi i dozës përforcuese për adoleshentët 16 dhe 17 vjeç është në proces e sipër.
Komiteti për vaksina në Gjermani muajin e kaluar ka rekomanduar që të gjithë fëmijët nga mosha 12 deri në 17 vjeç mund të marrin dozën përforcuese, teksa infektimet me koronavirus në mesin e të rinjve janë rritur.
EMA tha se “këshilla se si vaksinat duhet të jepen mbetet” në dorën e grupeve këshilluese të shteteve anëtare të BE-së.
Qendra Evropiane për Kontrollin dhe Parandalimin e Sëmundjeve (ECDC) tha se gjetjet e një studimi kanë sugjeruar rritje të efektivitetit të vaksinave ndaj infeksionit tek adoleshentët që kanë marrë dozën përforcuese në krahasim me ata që kanë marrë vetëm dy doza të vaksinës.
ECDC tha se dhjetë shtete të BE-së kanë rekomanduar dhënien e dozave përforcuese për personat nën 18 vjeç. /REL/